2025 წლის, 26 და 27 აპრილს, ჯუნიორ ეჩივმენტი საქართველო, ჯუნიორ ეჩივმენტი ალუმნი საქართველოსთან და PMI თბილისი, საქართველოს წარმომადგენლობათან თანამშრომლობით, მართავს 2-დღიან, ონლაინ ინოვაციების ბანაკს თემაზე, „პროექტის მენეჯმენტი“.
ინოვაციების ბანაკი ეს არის იდეების ინტენსიური გენერირების 12 საათიანი ღონისძიება, სადაც 15-დან 18 წლამდე ახალგაზრდები თავს იყრიან კონკრეტული ბიზნეს გამოწვევის გარშემო, რომლის შესახებაც უნდა წარმოადგინონ იდეები და ეფექტური მეთოდებით გადაჭრან პრობლემა. ასევე, ახალგაზრდები სწავლობენ, თუ როგორ უნდა მოახდინონ იდეების განვითარება და ჩამოყალიბება შეზღუდული დროის პირობებში. მუშაობის პროცესში მათ აქვთ წვდომა მათთვის საჭირო ხელსაწყოებზე, ინფორმაციასა და რესურსებზე.
ღონისძიების ოფიციალურად გახსნამდე მონაწილეები გადანაწილდებიან ჯგუფებში (ჯგუფში 10 მოსწავლე). მონაწილეები შეიძლება არ იცნობდნენ ერთმანეთს, ამიტომ მათ მალევე უნდა მოახერხონ ჯგუფში ადაპტირება და ეფექტიანი სამუშაო გეგმის შედგენა.
გუნდების ფორმირების დასრულების შემდეგ, ახალგაზრდები გაეცნობიან ბიზნეს გამოწვევას, რომლის გადაჭრის გზებზე იმუშავებენ 12 საათის განმავლობაში. აღნიშნული ბიზნეს ამოცანა იქნება სპეციფიური და რეალური პრობლემების შესახებ. ეს კი ითვალისწინებს, რომ ისინი ღრმად უნდა გაეცნონ მოცემული მიმართულებებით ქვეყანაში არსებულ სიტუაციას, კარგად უნდა შეისწავლონ ინდუსტრია, სახელმწიფოს მოქმედების სტრატეგია და განავითარონ ისეთი საქონლის და/ან მომსახურების კონცეფცია, რომელიც დაეხმარებათ მათ პრობლემის სწორად და ეფექტურად გადაჭრაში. მონაწილეებს ეყოლებათ გამოცდილი მენტორები სხვადსხვა სექტორიდან, რომლებიც გაუწევენ ინტენსიურ კონსულტაციებს, მიაწვდიან საჭირო ინფორმაციას და დაეხმარებიან იდეების განვითარებაში.
ღონისძიებაზე თითოეული გუნდი ვალდებულია წარმოადგინოს ბიზნესგეგმა და 4 წუთიანი პრეზენტაცია, რომლის მიხედვითაც დღის ბოლოს ჟიური გამოავლენს გამარჯვებულ გუნდს.
გამარჯვებული გუნდი დასაჩუქრდება სიმბოლური საჩუქრებით, ასევე, ღონისძიების ყველა მონაწილეს გადაეცემა 120-ზე მეტ ქვეყანაში ცნობადი სერტიფიკატი „ინოვაციების ბანაკში“ მონაწილეობისათვის.
ღონისძიებაში მონაწილეობისთვის სკოლის წარმომადგენელმა უნდა შეავსოს განაცხადის ფორმა, რის შემდეგაც ორგანიზაციის წარმომადგენელი დაუკავშირდება და მიაწვდის შემდგომ ინსტრუქციებს.
